ନୟାଗଡ଼, (ଓଡ଼ିଶା ଲେଖା): ରାଜନୈତିକ ମତପାର୍ଥକ୍ୟଠାରୁ ଊର୍ଦ୍ଧ୍ୱରେ ରହି ପ୍ରତିଭା ଓ ସଫଳତାକୁ ସମ୍ମାନ ଜଣାଇବାର ଏକ ସୁନ୍ଦର ଉଦାହରଣ ଦେଖିବାକୁ ମିଳିଛି ନୟାଗଡ଼ ଜିଲ୍ଲା ଖଣ୍ଡପଡ଼ା ବ୍ଲକ ଅନ୍ତର୍ଗତ ବଳରାମପ୍ରସାଦ ଗ୍ରାମରେ। ନୟାଗଡ଼ ସ୍ୱୟଂଶାସିତ ମହାବିଦ୍ୟାଳୟର ନବନିର୍ବାଚିତ ଛାତ୍ର କଂଗ୍ରେସ ସମର୍ଥିତ ଛାତ୍ରୀ ଉପସଭାପତି ସୁନନ୍ଦା ଲେଙ୍କାଙ୍କୁ ଗ୍ରାମ ମଞ୍ଚରେ ସମ୍ବର୍ଦ୍ଧିତ କରାଯାଇଛି। ଖଣ୍ଡପଡ଼ାର ବିଜେପି ବିଧାୟକ ଇଂ. ଦୁଷ୍ମନ୍ତ କୁମାର ସ୍ୱାଇଁଙ୍କ ଉପସ୍ଥିତିରେ ଗ୍ରାମ କମିଟି ପକ୍ଷରୁ ତାଙ୍କୁ ଶୁଭେଚ୍ଛା ଓ ସମ୍ମାନ ଜଣାଯାଇଥିଲା। ସୂଚନାନୁସାରେ, ବଳରାମପ୍ରସାଦ ଗ୍ରାମରେ ଦଶହରା ପର୍ବ ଧୁମ୍ଧାମରେ ପାଳନ କରାଯାଇଥିଲା। ଏହି ଅବସରରେ ଗ୍ରାମର ମଙ୍ଗଳା ସାହିରେ ମା’ ମଙ୍ଗଳାଙ୍କ ଯାତ୍ରା ଉପଲକ୍ଷେ ଏକ ସାମାଜିକ ନାଟକ ‘ଦରିଆ କୂଳର ଦରଦୀ ବନ୍ଧୁ’ର ଉଦ୍ଘାଟନୀ କାର୍ଯ୍ୟକ୍ରମ ଆୟୋଜିତ ହୋଇଥିଲା। ଏଥିରେ ଖଣ୍ଡପଡ଼ା ବିଧାୟକ ଇଂ. ଦୁଷ୍ମନ୍ତ କୁମାର ସ୍ୱାଇଁ ମୁଖ୍ୟ ଅତିଥି ଭାବେ ଯୋଗଦେଇ ନାଟକର ଶୁଭାରମ୍ଭ କରିଥିଲେ। ଏହି ଅବସରରେ ଗ୍ରାମର ପ୍ରଦୀପ କୁମାର ଲେଙ୍କାଙ୍କ ଝିଅ ସୁନନ୍ଦା ଲେଙ୍କାଙ୍କୁ ତାଙ୍କ ନିର୍ବାଚନୀ ସଫଳତା ପାଇଁ ସମ୍ବର୍ଦ୍ଧିତ କରାଯାଇଥିଲା। ସୁନନ୍ଦା ନୟାଗଡ଼ ସ୍ୱୟଂଶାସିତ ମହାବିଦ୍ୟାଳୟର ଛାତ୍ର ସଂସଦ ନିର୍ବାଚନରେ ଛାତ୍ର କଂଗ୍ରେସ ସମର୍ଥିତ ପ୍ରାର୍ଥିନୀ ଭାବେ ଉପସଭାପତି ପଦ ପାଇଁ ପ୍ରତିଦ୍ୱନ୍ଦ୍ୱିତା କରି ୩୦୦ରୁ ଅଧିକ ଭୋଟ୍ ବ୍ୟବଧାନରେ ବିଜୟୀ ହୋଇଥିଲେ। ତାଙ୍କର ଏହି ସଫଳତାରେ ଗ୍ରାମବାସୀ ଖୁସି ପ୍ରକାଶ କରିବା ସହ ଗ୍ରାମ କମିଟି ପକ୍ଷରୁ ବିଧାୟକଙ୍କ ହାତରେ ତାଙ୍କୁ ଶୁଭେଚ୍ଛା ଜଣାଇ ସମ୍ବର୍ଦ୍ଧନା ପ୍ରଦାନ କରାଯାଇଥିଲା। ଏହି କାର୍ଯ୍ୟକ୍ରମରେ ସମିତି ସଭ୍ୟ ମହେଶ୍ୱର ରାଉତ, ପୂର୍ବତନ ସରପଞ୍ଚ ନିରଞ୍ଜନ ପଣ୍ଡା, ଶତ୍ରୁଘ୍ନ ବରିକ, ଗୋପାଳ ମହାନ୍ତି, ବାପୁନି ଦାଶ, ପ୍ରମୋଦ ପଢ଼ିଆରୀ, ବିରୁପାକ୍ଷ ତ୍ରିପାଠୀ, ବିଭୂତି ଦାଶ, ବିଘିନ ମହାରଣା ଓ ନାରାୟଣ ରାଉତଙ୍କ ସମେତ ବହୁ ଗ୍ରାମବାସୀ ଉପସ୍ଥିତ ଥିଲେ।
ଗାଁ ମଞ୍ଚରେ ସମ୍ବର୍ଦ୍ଧିତ ହେଲେ ସୁନନ୍ଦା:କଂଗ୍ରେସ ସମର୍ଥିତ ଛାତ୍ରୀ ଉପସଭାପତିଙ୍କୁ ସମ୍ମାନିତ କଲେ ବିଜେପି ବିଧାୟକ
