ନୟାଗଡ଼, (ଓଡ଼ିଶା ଲେଖା): ଉତ୍କଳ ସାମ୍ବାଦିକ ସଂଘ ନୟାଗଡ଼ ଜିଲ୍ଲା ଶାଖାର ପରିଚାଳନା କମିଟି ବୈଠକ ଫତେଗଡ଼ସ୍ଥିତ ଶ୍ରୀରାମ ମନ୍ଦିର ପରିସରରେ ଅନୁଷ୍ଠିତ ହୋଇଯାଇଛି। ଏହି ବୈଠକରେ ଜିଲ୍ଲା ଶାଖାର ପରିଚାଳନା କମିଟି ପୁନର୍ଗଠନ କରାଯାଇ ଆଗାମୀ ଦୁଇ ବର୍ଷ ପାଇଁ ନୂତନ କର୍ମକର୍ତ୍ତା ଚୟନ କରାଯାଇଛି। ଚିତ୍ତରଞ୍ଜନ ମିଶ୍ର ନୂତନ ସଭାପତି ଭାବେ ମନୋନୀତ ହୋଇଥିବା ବେଳେ ରବୀନ୍ଦ୍ର କୁମାର ଦାସ କାର୍ଯ୍ୟକାରୀ ସଭାପତି ଏବଂ ବୈଦ୍ୟ ଭୂଷଣ ମହାପାତ୍ର ସମ୍ପାଦକ ଭାବେ ନିଯୁକ୍ତ କରାଯାଇଛି । ସଂଘର ସମ୍ପାଦକ ବୈଦ୍ୟ ଭୂଷଣ ମହାପାତ୍ରଙ୍କ ଅଧ୍ୟକ୍ଷତାରେ ଆୟୋଜିତ ଏହି ବୈଠକକୁ ଭାପୁର ଶାଖା ପକ୍ଷରୁ ପରିଚାଳନା କରାଯାଇଥିଲା। ବୈଠକରେ ଆଗାମୀ ବର୍ଷ ପାଇଁ ସଦସ୍ୟତା ନବୀକରଣ ସମ୍ପର୍କରେ ଆଲୋଚନା ହେବା ସହ ବ୍ଲକ୍ ସଂଯୋଜକମାନଙ୍କୁ ଏଥିପାଇଁ ଦାୟିତ୍ୱ ଦିଆଯାଇଥିଲା। ସଂଯୋଜକମାନେ ଚଳିତ ବର୍ଷର ସଦସ୍ୟ ତାଲିକା ଓ ନବୀକରଣ ଦେୟ ବୈଠକରେ ପ୍ରଦାନ କରିଥିଲେ। ରାଜ୍ୟ କାର୍ଯ୍ୟକାରିଣୀ ସଦସ୍ୟ ପ୍ରଶାନ୍ତ କୁମାର ସାହୁ ନୂତନ ସଭାପତି ଭାବେ ଚିତ୍ତରଞ୍ଜନ ମିଶ୍ରଙ୍କ ନାମ ପ୍ରସ୍ତାବ ଦେଇଥିଲେ। ଏହି ପ୍ରସ୍ତାବ ସର୍ବସମ୍ମତିକ୍ରମେ ଗୃହୀତ ହୋଇଥିଲା। ଅନ୍ୟ ପଦାଧିକାରୀଙ୍କ ମଧ୍ୟରେ ଉପସଭାପତି ଭାବେ ପ୍ରଫୁଲ୍ଲ କୁମାର ଦାଶ ଓ ଶୁଭେନ୍ଦ୍ର ପଟ୍ଟନାୟକ, ଯୁଗ୍ମ ସମ୍ପାଦକ ଭାବେ ଅଶୋକ ମହାପାତ୍ର, ଅନୀଲ କୁମାର ପଣ୍ଡା ଓ ସଂଗ୍ରାମ କେଶରୀ ପଟ୍ଟନାୟକ ମନୋନୀତ ହୋଇଛନ୍ତି। ସେହିପରି ବିଶ୍ୱଜିତ୍ ନାୟକ କୋଷାଧ୍ୟକ୍ଷ ଏବଂ ଦେବୀ ପ୍ରସାଦ ଦାଶ, ଶିବଦତ୍ତ ପାତ୍ର, ପ୍ରଭାତ ବରାଡ଼, ଚିରଞ୍ଜିବୀ ଦାଶ, ନିହାର ପଟ୍ଟନାୟକ ଓ ସାରସ କୁମାର ମିଶ୍ର ସାଂଗଠନିକ ସମ୍ପାଦକ ଭାବେ ଚୟନ ହୋଇଛନ୍ତି।
ରାମକୃଷ୍ଣ ରଥ ଓ ଚନ୍ଦ୍ର ବିଜୟୀ ମିଶ୍ର ସମୀକ୍ଷକ ଭାବେ ମନୋନୀତ ହୋଇଥିବା ବେଳେ ବିଭୂତି ଭୂଷଣ ସ୍ୱାଇଁ ଓ ଜନ୍ମେଜୟ ଦଳେଇ ଗଣମାଧ୍ୟମ ସଂଯୋଜକ ଦାୟିତ୍ୱ ପାଇଛନ୍ତି। ଜିଲ୍ଲା ଶାଖାର ଉପଦେଷ୍ଟା ଭାବେ ବରିଷ୍ଠ ସାମ୍ବାଦିକ ଏସ୍.ଏ. ମନାନ, ପ୍ରଦୀପ୍ତ ପଟ୍ଟନାୟକ, ରବୀନ୍ଦ୍ର ପଟ୍ଟନାୟକ ଓ ସନାତନ ଷଡ଼ଙ୍ଗୀଙ୍କୁ ଚୟନ କରାଯାଇଛି।ବ୍ୟକ୍ତିଗତ କାରଣରୁ ପୂର୍ବତନ ସଭାପତି ଶ୍ରୀକାନ୍ତ ଖଟେଇ ରାଜ୍ୟ ସଭାପତିଙ୍କ ନିକଟରେ ଇସ୍ତଫା ଦେଇଥିବା ବିଷୟ ବୈଠକରେ ଜଣାଯାଇଥିଲା। ସେ ଆଗାମୀ ଦିନରେ ରାଜ୍ୟ ଶୃଙ୍ଖଳା କମିଟିର ଅଧ୍ୟକ୍ଷ ଭାବେ କାର୍ଯ୍ୟ କରିବା ନେଇ ରାଜ୍ୟ ସଭାପତିଙ୍କ ସହ ଆଲୋଚନା କରିଥିବା ସୂଚନା ଦିଆଯାଇଥିଲା। ରାଜ୍ୟ ସଭାପତି ଭିଡିଓ କନ୍ଫରେନ୍ସ ମାଧ୍ୟମରେ ବୈଠକରେ ଯୋଗଦେଇ ଏ ସମ୍ପର୍କରେ ଅବଗତ କରାଇଥିଲେ। ରାଜ୍ୟ କାର୍ଯ୍ୟକାରିଣୀ ସଦସ୍ୟ ପ୍ରଶାନ୍ତ କୁମାର ସାହୁ ପୂର୍ବଭଳି ନିଜ ଦାୟିତ୍ୱ ତୁଲାଇବେ ବୋଲି ମଧ୍ୟ ନିଷ୍ପତ୍ତି ହୋଇଥିଲା। ରାଜ୍ୟ ସଂଘର ନିର୍ବାଚନ ଶେଷ ହେବା ପରେ ଆସନ୍ତା ଡିସେମ୍ବର ମାସରେ ଜିଲ୍ଲା ଶାଖାର ସାଧାରଣ ସଭା ଆୟୋଜନ କରିବାକୁ ବୈଠକରେ ସ୍ଥିର ହୋଇଛି। ଏଥିସହ ଜିଲ୍ଲାର ପ୍ରତ୍ୟେକ ବ୍ଲକ୍ରେ ସଂଘର ସାଂଗଠନିକ ସ୍ଥିତିକୁ ମଜବୁତ କରିବା ଏବଂ ପ୍ରତି ତିନି ମାସରେ ଭିନ୍ନ ଭିନ୍ନ ବ୍ଲକ୍ରେ ବୈଠକ ଆୟୋଜନ କରିବା ଉପରେ ଗୁରୁତ୍ୱ ଦିଆଯାଇଥିଲା।ଆଗାମୀ ଦିନରେ ସାମ୍ବାଦିକମାନଙ୍କ କଲ୍ୟାଣ ସହ ସମାଜର ବିଭିନ୍ନ ଜନହିତକର କାର୍ଯ୍ୟରେ ସଂଘ ସକ୍ରିୟ ଭୂମିକା ନିର୍ବାହ କରିବ ବୋଲି ବୈଠକରେ ମତପ୍ରକାଶ ପାଇଥିଲା। ବୈଠକରେ ଜିଲ୍ଲାର ବିଭିନ୍ନ ବ୍ଲକ୍ର ସଭାପତି ଓ ସଂଯୋଜକମାନେ ଯୋଗଦେଇଥିଲେ। ଶେଷରେ ବରିଷ୍ଠ ସାମ୍ବାଦିକ ରବୀନ୍ଦ୍ର ପଟ୍ଟନାୟକ ଉପସ୍ଥିତ ସଦସ୍ୟମାନଙ୍କୁ ଆଶୀର୍ବଚନ ପ୍ରଦାନ କରିଥିଲେ।
