ଦଶହରା ପୂର୍ବରୁ ହେବ ଛାତ୍ର ସଂସଦ ନିର୍ବାଚନ ଛାତ୍ର :୧୫ରେ ନିର୍ବାଚନ, ୧୬ରେ ଶପଥ ଗ୍ରହଣ:ଛାତ୍ର ସଂସଦ ନିର୍ବାଚନକୁ ନେଇ ସରଗରମ କଲେଜ କ୍ୟାମ୍ପସ

ନୟାଗଡ଼, (ଓଡ଼ିଶା ଲେଖା): ଦୀର୍ଘ ଅପେକ୍ଷାର ଅନ୍ତ ଘଟାଇ ରାଜ୍ୟରେ ଛାତ୍ର ସଂସଦ ନିର୍ବାଚନ ତାରିଖ ଘୋଷଣା ହୋଇଛି। ଦଶହରା ପୂର୍ବରୁ ଅର୍ଥାତ ଆସନ୍ତା ୧୫ ତାରିଖରେ ଛାତ୍ର ସଂସଦ ନିର୍ବାଚନ ଅନୁଷ୍ଠିତ ହେବ। ଏହାର ପରଦିନ, ଅର୍ଥାତ୍ ୧୬ ତାରିଖରେ ନବନିର୍ବାଚିତ ଛାତ୍ର ପ୍ରତିନିଧିମାନଙ୍କ ଶପଥ ଗ୍ରହଣ ସମାରୋହ ଅନୁଷ୍ଠିତ ହେବ। ମୁଖ୍ୟମନ୍ତ୍ରୀଙ୍କ ସହ ବୈଠକ ପରେ ଛାତ୍ର ସଂସଦ ନିର୍ବାଚନ ସମ୍ପର୍କରେ ମନ୍ତ୍ରୀ ସୂର୍ଯ୍ୟବଂଶୀ ସୂରଜ ଏହି ସୂଚନା ଦେଇଛନ୍ତି। ମନ୍ତ୍ରୀଙ୍କ ସୂଚନା ଅନୁଯାୟୀ, ୭ ତାରିଖରେ ସମ୍ପୃକ୍ତ କଲେଜଗୁଡ଼ିକ ପକ୍ଷରୁ ନିର୍ବାଚନ ସମ୍ପର୍କିତ ବିଜ୍ଞପ୍ତି ପ୍ରକାଶ ପାଇବ। ୯ ତାରିଖରେ ପ୍ରାର୍ଥୀମାନେ ନାମାଙ୍କନ ଦାଖଲ କରିବେ। ଛାତ୍ର ସଂସଦ ନିର୍ବାଚନ ସମାପ୍ତ ହେବା ପରେ ଦଶହରା ଛୁଟି ହେବ ବୋଲି ମଧ୍ୟ ଜଣାପଡ଼ିଛି। ନିର୍ବାଚନ ତାରିଖ ଘୋଷଣା ପରେ ବିଭିନ୍ନ ମହଲରେ ଉତ୍ସାହ ବଢ଼ିଥିବା ବେଳେ କଲେଜ କ୍ୟାମ୍ପସଗୁଡ଼ିକରେ ରାଜନୈତିକ ଓ ଛାତ୍ରୀୟ କାର୍ଯ୍ୟକଳାପ ମଧ୍ୟ ସରଗରମ ହେବାର ଆଶା ଦେଖାଦେଇଛି।ବିଶେଷକରି ନୟାଗଡ଼ ଜିଲ୍ଲାର ବିଭିନ୍ନ କଲେଜରେ ଛାତ୍ର ସଂସଦ ନିର୍ବାଚନକୁ ନେଇ ଉତ୍କଣ୍ଠା ବଢ଼ିଛି। ତାରିଖ ଘୋଷଣା ହେବା ମାତ୍ରେ ସମ୍ଭାବ୍ୟ ପ୍ରାର୍ଥୀ ଓ ସେମାନଙ୍କ ସମର୍ଥକମାନେ ନିଜ ନିଜ ରଣନୀତି ପ୍ରସ୍ତୁତ କରିବା ଆରମ୍ଭ କରିଦେଇଛନ୍ତି। କିଏ କେଉଁ ପଦବୀ ପାଇଁ ମଇଦାନକୁ ଓହ୍ଲାଇବେ ଏବଂ କେଉଁ ଗୋଷ୍ଠୀ କାହାକୁ ସମର୍ଥନ କରିବ—ତାହାକୁ ନେଇ କ୍ୟାମ୍ପସରେ ଚର୍ଚ୍ଚା ଜୋର ଧରିଛି। ନିର୍ବାଚନ ପାଇଁ ଆଉ କମ୍ ସମୟ ଥିବାରୁ ଛାତ୍ରନେତା ଓ ସମର୍ଥକମାନେ ଏବେଠାରୁ ନିଜ ସମର୍ଥନ ଜୁଟାଇବା ଏବଂ ପ୍ରଚାର ରଣନୀତି ପ୍ରସ୍ତୁତ କରିବାରେ ବ୍ୟସ୍ତ ହୋଇପଡ଼ିଛନ୍ତି।