ବଡ଼ମ୍ବା, (ଓଡ଼ିଶା ଲେଖା): କଟକ ଜିଲ୍ଲା ଆଠଗଡ଼–ନରସିଂହପୁର ୬୫ ନମ୍ବର ରାଜ୍ୟ ରାଜପଥର ବଡ଼ମ୍ବା ନିକଟସ୍ଥ ଗୋପପୁର ଠାରେ ଚାଲିଥିବା ରାସ୍ତା ନିର୍ମାଣ କାମକୁ ନେଇ ସ୍ଥାନୀୟ ଅଞ୍ଚଳରେ ଅସନ୍ତୋଷ ଦେଖାଦେଇଛି। ବର୍ଷା ଲାଗି ରହିଥିବା ସତ୍ତ୍ୱେ ରାସ୍ତା ଉପରେ ପିଚୁ ବିଛାଇବା କାର୍ଯ୍ୟ ଜାରି ରହିଥିବାରୁ କାମର ମାନ ଓ ରାସ୍ତାର ସ୍ଥାୟୀତ୍ୱକୁ ନେଇ ସ୍ଥାନୀୟ ବୁଦ୍ଧିଜୀବୀ ଓ ସଚେତନ ନାଗରିକଙ୍କ ମଧ୍ୟରେ ପ୍ରଶ୍ନ ଉଠିଛି। ସ୍ଥାନୀୟଙ୍କ ଅଭିଯୋଗ ଅନୁଯାୟୀ, ବର୍ଷା ହେଉଥିବା ସମୟରେ ପିଚୁ ବିଛାଇବା ଦ୍ୱାରା ରାସ୍ତାର ଗୁଣବତ୍ତା ଓ ଦୀର୍ଘସ୍ଥାୟୀତ୍ୱ ପ୍ରଭାବିତ ହୋଇପାରେ। ଏନେଇ କେତେକ ସ୍ଥାନୀୟ ବ୍ୟକ୍ତି କାର୍ଯ୍ୟସ୍ଥଳରେ ଆପତ୍ତି ଜଣାଇଥିଲେ ମଧ୍ୟ କାମ ବନ୍ଦ ନକରି ପିଚୁ ବିଛାଇବା ଜାରି ରହିଥିବା ଅଭିଯୋଗ ହୋଇଛି।
ରାସ୍ତା ନିର୍ମାଣରେ ନିର୍ଦ୍ଧାରିତ ମାନଦଣ୍ଡ ଓ ବୈଷୟିକ ନିୟମ ପାଳନ ହେଉଛି କି ନାହିଁ, ତାହାର ନିରପେକ୍ଷ ଯାଞ୍ଚ ଆବଶ୍ୟକ ବୋଲି ସ୍ଥାନୀୟ ଲୋକେ ଦାବି କରିଛନ୍ତି। ବିଶେଷକରି ବର୍ଷା ସମୟରେ ପିଚୁ ପକାଯାଇଥିବାରୁ ଏହାର ଗୁଣବତ୍ତା ପରୀକ୍ଷା କରିବା ସହ ଆବଶ୍ୟକ ହେଲେ ନମୁନା ସଂଗ୍ରହ କରି ଲାବରେଟୋରୀ ପରୀକ୍ଷା କରାଯାଉ ବୋଲି ଦାବି ହୋଇଛି। ଏହି ଘଟଣା ପ୍ରତି ବିଭାଗୀୟ ଅଧୀକ୍ଷଣ ଯନ୍ତ୍ରୀ, ଜିଲ୍ଲା ପ୍ରଶାସନ ଓ ସ୍ଥାନୀୟ ବିଧାୟକ ତୁରନ୍ତ ଦୃଷ୍ଟି ଦେଇ ରାସ୍ତା କାମର ମାନ ଯାଞ୍ଚ କରିବା ସହ ଅନିୟମିତତା ପ୍ରମାଣିତ ହେଲେ ଦାୟୀ ବ୍ୟକ୍ତିଙ୍କ ବିରୋଧରେ ନିୟମାନୁଯାୟୀ ତୁରନ୍ତ ପଦକ୍ଷେପ ନେବାକୁ ଅଞ୍ଚଳବାସୀ ଦାବି କରିଛନ୍ତି।
