ନୟାଗଡ଼, (ଓଡ଼ିଶା ଲେଖା): ଯତ୍ନ ଓ ସୁରକ୍ଷା ଆବଶ୍ୟକ କରୁଥିବା ଶିଶୁମାନଙ୍କୁ ଶିକ୍ଷା, ସାଧାରଣ ଜ୍ଞାନ, କୌଶଳ ଓ ବୃତ୍ତିମୂଳକ ଶିକ୍ଷା ସମ୍ପର୍କରେ ପ୍ରତ୍ୟକ୍ଷ ଅନୁଭୂତି ପ୍ରଦାନ ଲକ୍ଷ୍ୟରେ ଭୁବନେଶ୍ୱରକୁ ଶିକ୍ଷଣୀୟ କ୍ଷେତ୍ର ପରିଦର୍ଶନ କାର୍ଯ୍ୟକ୍ରମ ଆୟୋଜିତ ହୋଇଛି। ଜିଲ୍ଲାପାଳ ମଧୁମିତା ରଥଙ୍କ ଉପସ୍ଥିତିରେ ଶିଶୁମାନଙ୍କୁ ନେଇ ଯାଉଥିବା ବସ୍କୁ ସବୁଜ ପତାକା ଦେଖାଇ ଏହି ଗସ୍ତର ଶୁଭାରମ୍ଭ କରିଥିଲେ।ଏହି ଶିକ୍ଷଣୀୟ ପରିଦର୍ଶନ ଗସ୍ତରେ ନୟାଗଡ଼ ଜିଲ୍ଲାର ୫୦ ଜଣ ଶିଶୁ ଅଂଶଗ୍ରହଣ କରିଛନ୍ତି।
ଭୁବନେଶ୍ୱରସ୍ଥିତ ଇଣ୍ଡିଆନ୍ ଇନ୍ଷ୍ଟିଚ୍ୟୁଟ୍ ଅଫ୍ ହୋଟେଲ ମ୍ୟାନେଜମେଣ୍ଟ (IHM) ଏବଂ ୱାର୍ଲ୍ଡ ସ୍କିଲ୍ ସେଣ୍ଟର ପରିଦର୍ଶନ କରି ଶିଶୁମାନେ ହୋଟେଲ ପରିଚାଳନା, ବିଭିନ୍ନ କୌଶଳ ଓ ବୃତ୍ତିମୂଳକ ଶିକ୍ଷା ସମ୍ପର୍କରେ ଜ୍ଞାନ ଆହରଣ କରିବା ଉପରେ ପଚାରି ବୁଝିଥିଲେ। ଏହା ମାଧ୍ୟମରେ ଭବିଷ୍ୟତ କ୍ୟାରିୟର ଓ ଚାକିରିର ବିଭିନ୍ନ ସୁଯୋଗ ସମ୍ପର୍କରେ ମଧ୍ୟ ସେମାନଙ୍କୁ ଅବଗତ କରାଯିବ। ପାଠ୍ୟପୁସ୍ତକ ଜ୍ଞାନ ସହିତ ପ୍ରତ୍ୟକ୍ଷ ଅନୁଭୂତି ମାଧ୍ୟମରେ ଶିଶୁମାନଙ୍କ ଜ୍ଞାନର ପରିସରକୁ ବ୍ୟାପକ କରିବା ଏହି ଗସ୍ତର ମୁଖ୍ୟ ଉଦ୍ଦେଶ୍ୟ। ଶିଶୁମାନଙ୍କ ସୁରକ୍ଷା, ଯତ୍ନ ଓ ସାମଗ୍ରିକ ବିକାଶ ସହିତ ସେମାନଙ୍କ ମାନସିକ, ସାମାଜିକ ଓ ସୃଜନଶୀଳ ବିକାଶକୁ ମଧ୍ୟ ଏହି କାର୍ଯ୍ୟକ୍ରମରେ ଗୁରୁତ୍ୱ ଦିଆଯାଇଛି।
କାର୍ଯ୍ୟକ୍ରମରେ ଜିଲ୍ଲା ଶିଶୁ ସୁରକ୍ଷା ଅଧିକାରୀ ସିବିୟନ ପ୍ରଧାନ, ଅନୁଷ୍ଠାନିକ ଯତ୍ନ ଅଧିକାରୀ ସତ୍ୟ ରଞ୍ଜନ ଦାଶ, ଅଣ-ଆନୁଷ୍ଠାନିକ ଯତ୍ନ ଅଧିକାରୀ ଶୈଳବାଳା ଦାଶ, ସାମାଜିକ କର୍ମୀ ସୁନିତା ସାହୁଙ୍କ ସମେତ ସମ୍ପୃକ୍ତ କର୍ମଚାରୀ ଓ ଅନ୍ୟମାନେ ଉପସ୍ଥିତ ଥିଲେ।ଗସ୍ତକୁ ନେଇ ଶିଶୁମାନଙ୍କ ମଧ୍ୟରେ ବେଶ୍ ଉତ୍ସାହ ଓ ଆନନ୍ଦ ପରିଲକ୍ଷିତ ହୋଇଥିଲା। ଏଭଳି ଅନୁଭୂତିମୂଳକ ଶିକ୍ଷଣୀୟ କାର୍ଯ୍ୟକ୍ରମ ଶିଶୁମାନଙ୍କ ଭବିଷ୍ୟତ ଗଠନରେ ସହାୟକ ହେବା ସହିତ ନୂତନ କୌଶଳ ଓ କ୍ୟାରିୟର ସୁଯୋଗ ସମ୍ପର୍କରେ ଜାଣିବାରେ ସହାୟତା କରିବ ବୋଲି ମତ ପ୍ରକାଶ ପାଇଛି।
