ନୟାଗଡ଼, (ଓଡ଼ିଶା ଲେଖା): ନୟାଗଡ଼ ବ୍ଲକ ଅନ୍ତର୍ଗତ ନାଟୁଗାଁ ଗ୍ରାମପଞ୍ଚାୟତର ନାଟୁଗାଁ ଗ୍ରାମରେ ରାସ୍ତା ପାର୍ଶ୍ୱରେ ଥିବା ଏକ ବିଦ୍ୟୁତ୍ ଟ୍ରାନ୍ସଫର୍ମରକୁ ନେଇ ଜନସଧାରଣଙ୍କ ସୁରକ୍ଷା ନେଇ ଚିନ୍ତା ବଢ଼ିଛି। ଟ୍ରାନ୍ସଫର୍ମର ଚାରିପାଖରେ ଉପଯୁକ୍ତ ସୁରକ୍ଷା ବାଡ଼ କିମ୍ବା ସୀମା ପ୍ରାଚୀର ନଥିବାରୁ ଯେକୌଣସି ସମୟରେ ଅଘଟଣ ଘଟିବାର ଆଶଙ୍କା ରହିଛି। ସୂଚନାନୁସାରେ, ନୟାଗଡ଼ ସଦର ବ୍ଲକ ନାଟୁଗାଁ ପଞ୍ଚାୟତ ନିକଟରେ ଏକ ଗାଈ ଜୀବନ୍ତ ବିଦ୍ୟୁତ୍ ଉପକରଣ ସଂସ୍ପର୍ଶରେ ଆସି ମୃତ୍ୟୁବରଣ କରିଥିବା ବେଳେ ଟ୍ରାନ୍ସଫର୍ମର ନିକଟରେ ବିଦ୍ୟୁତ୍ ଆଘାତରେ ଅନେକ ମାଙ୍କଡ଼ ମୃତ୍ୟୁବରଣ କରିଥିବା ମଧ୍ୟ ଜଣାପଡ଼ିଛି। ଏଭଳି ଘଟଣା ପରେ ସ୍ଥାନୀୟ ଲୋକଙ୍କ ମଧ୍ୟରେ ସୁରକ୍ଷାକୁ ନେଇ ଚିନ୍ତା ପ୍ରକାଶ ପାଇଛି। ବିଶେଷକରି ଟ୍ରାନ୍ସଫର୍ମରଟି ପଞ୍ଚାୟତ କାର୍ଯ୍ୟାଳୟ, ସରକାରୀ ହସ୍ପିଟାଲ୍ ଏବଂ ଗ୍ରାମର କ୍ରୀଡ଼ା, ମନୋରଞ୍ଜନ ପାର୍କ ଓ ଶ୍ମଶାନ ନିକଟରେ ରହିଛି। ଫଳରେ ପ୍ରତିଦିନ ଏହି ଅଞ୍ଚଳ ଦେଇ ଶହ ଶହ ଲୋକ, ବୟସ୍କ, ମହିଳା, ଶିଶୁ ଓ ରୋଗୀମାନେ ଯାତାୟାତ କରୁଛନ୍ତି। ଏଭଳି ସ୍ଥାନରେ ଅସୁରକ୍ଷିତ ଅବସ୍ଥାରେ ଟ୍ରାନ୍ସଫର୍ମର ରହିବା ଗୁରୁତର ବିପଦ ସୃଷ୍ଟି କରୁଥିବା ଅଭିଯୋଗ ହୋଇଛି। ଏହି ପରିପ୍ରେକ୍ଷୀରେ ଜନସାଧାରଣଙ୍କ ବୃହତ୍ତର ସ୍ୱାର୍ଥ ଓ ସୁରକ୍ଷାକୁ ଦୃଷ୍ଟିରେ ରଖି ନୟାଗଡ଼ ବିଧାୟକ ଡ଼ ଅରୁଣ କୁମାର ସାହୁ ଟିପିସିଓଡିଏଲ୍ର ଅଧୀକ୍ଷଣ ଯନ୍ତ୍ରୀଙ୍କୁ ଚିଠି ଲେଖିଛନ୍ତି। ଟ୍ରାନ୍ସଫର୍ମରଟିକୁ ଏକ ଉପଯୁକ୍ତ ଓ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରିବା କିମ୍ବା ଏହା ଚାରିପାଖରେ ଶୀଘ୍ର ଏକ ଉପଯୁକ୍ତ ସୀମା ପ୍ରାଚୀର/ସୁରକ୍ଷା ବାଡ଼ ନିର୍ମାଣ କରିବା ପାଇଁ ସେ ଆବଶ୍ୟକ ପଦକ୍ଷେପ ନେବାକୁ ପରାମର୍ଶ ଦେଇଛନ୍ତି। ସମ୍ଭାବ୍ୟ ମାନବ ଜୀବନ ଓ ସମ୍ପତ୍ତିହାନିକୁ ଏଡ଼ାଇବା ପାଇଁ ବିଦ୍ୟୁତ୍ ବିଭାଗ ଏହି ଘଟଣାକୁ ଗୁରୁତ୍ୱର ସହ ନେଇ ତୁରନ୍ତ ପ୍ରତିରୋଧମୂଳକ ପଦକ୍ଷେପ ନେବା ଆବଶ୍ୟକ ବୋଲି ସାଧାରଣରେ ଦାବି ହୋଇଛି।
ନାଟୁଗାଁରେ ମୁକୁଳା ପଡ଼ିଛି ବିଦ୍ୟୁତ୍ ଟ୍ରାନ୍ସଫର୍ମର: ଟିପିସିଓଡିଏଲ୍ ଅଧୀକ୍ଷଣ ଯନ୍ତ୍ରୀଙ୍କୁ ଚିଠି ଲେଖିଲେ ଅରୁଣ
