ନୟାଗଡ଼, (ଓଡ଼ିଶା ଲେଖା): Special Intensive Revision (SIR) ପରେ ଭୋଟର ତାଲିକାରେ ନାମ ପଞ୍ଜୀକରଣରୁ ବଞ୍ଚିତ ଯୋଗ୍ୟ ନାଗରିକ, ପ୍ରଥମ ଥର ଭୋଟର ଓ ଯୁବ ଭୋଟରଙ୍କ ନାମ ସାମିଲ କରିବା ପାଇଁ ନୟାଗଡ଼ ଜିଲ୍ଲାରେ ସ୍ୱତନ୍ତ୍ର ଅଭିଯାନ ଆରମ୍ଭ ହୋଇଛି। ଭାରତ ନିର୍ବାଚନ ଆୟୋଗ ଓ ଓଡ଼ିଶା ସରକାରଙ୍କ ମୁଖ୍ୟ ନିର୍ବାଚନ ଅଧିକାରୀ ନିର୍ଦ୍ଦେଶକ୍ରମେ ଜିଲ୍ଲା ପ୍ରଶାସନ ପକ୍ଷରୁ ଏହି ପଦକ୍ଷେପ ନିଆଯାଇଛି। ଅଭିଯାନ ଅଧୀନରେ ସମସ୍ତ ବୁଥ୍ସ୍ତରୀୟ ଅଧିକାରୀ (BLO) ନିଜ ଅଞ୍ଚଳର ବର୍ତ୍ତମାନର ନିର୍ବାଚକ ନାମାବଳୀକୁ SIR ପୂର୍ବର ତାଲିକା ସହ ତୁଳନା କରି ନାମ ରହିଯାଇଥିବା ଯୋଗ୍ୟ ଭୋଟରଙ୍କୁ ଚିହ୍ନଟ କରିବେ। ଏଥିସହ CEO, ଓଡ଼ିଶା ପକ୍ଷରୁ ଉପଲବ୍ଧ ASDD List ମଧ୍ୟ ଯାଞ୍ଚ କରାଯିବ। ଚିହ୍ନଟ ଭୋଟରଙ୍କ ବର୍ତ୍ତମାନ ସ୍ଥିତି ଜାଣିବା ପାଇଁ BLOମାନେ ଘରକୁ ଘର ଯାଇ ଯାଞ୍ଚ କରିବେ। ବର୍ତ୍ତମାନର ଭୋଟର ତାଲିକାରେ ନାମ ନଥିବା ଯୋଗ୍ୟ ନାଗରିକଙ୍କୁ Form-6 ଦାଖଲ କରିବାରେ ସହଯୋଗ କରାଯିବ। ପ୍ରଥମ ଥର ଭୋଟ ଦେବାକୁ ଯୋଗ୍ୟ ଯୁବକ-ଯୁବତୀଙ୍କୁ ମଧ୍ୟ ଏହି ଅଭିଯାନରେ ସାମିଲ କରାଯିବ। ପ୍ରତ୍ୟେକ BLOଙ୍କୁ ପ୍ରତି ସପ୍ତାହରେ ଅତି କମରେ ୨୦ରୁ ୨୫ ଜଣ ଚିହ୍ନଟ ଯୋଗ୍ୟ ବ୍ୟକ୍ତିଙ୍କୁ ଆବର୍ତ୍ତ କରିବା ପାଇଁ ଲକ୍ଷ୍ୟ ଦିଆଯାଇଛି। ଚିହ୍ନଟ ତାଲିକା, ପ୍ରାପ୍ତ Form-6 ଏବଂ କ୍ଷେତ୍ର ଯାଞ୍ଚ ରିପୋର୍ଟ ସମ୍ପୃକ୍ତ EROଙ୍କ ନିକଟରେ ଦାଖଲ କରାଯିବ। ଯୋଗ୍ୟ ନାଗରିକଙ୍କୁ ଭୋଟର ତାଲିକାରେ ନାମ ପଞ୍ଜୀକରଣରେ ସୁବିଧା ଦେବା ପାଇଁ ବିଭିନ୍ନ ସ୍ଥାନରେ Booth Level Camps ଆୟୋଜନ କରାଯିବ। ଆବଶ୍ୟକତା ଅନୁଯାୟୀ ରାତ୍ରି ଆଶ୍ରୟସ୍ଥଳ, ଶ୍ରମିକ ବସତି, ଗୃହହୀନ ବ୍ୟକ୍ତି ଓ ଅନ୍ୟ ବଞ୍ଚିତ ବର୍ଗଙ୍କ ପାଇଁ ମଧ୍ୟ ସ୍ୱତନ୍ତ୍ର ଶିବିର କରାଯିବ। ଏହି ଅଭିଯାନ ସମ୍ପର୍କରେ ଜନସାଧାରଣଙ୍କୁ ସଚେତନ କରିବାକୁ ବ୍ୟାପକ ଜନସଚେତନତା ଓ ଜନସଂଯୋଗ କାର୍ଯ୍ୟକ୍ରମ ହାତକୁ ନିଆଯିବ। ଜିଲ୍ଲାର ବିଶିଷ୍ଟ ବ୍ୟକ୍ତି, VIP, ଗଣମାଧ୍ୟମ ପ୍ରତିନିଧି ଓ ସାମାଜିକ ସଂଗଠନଗୁଡ଼ିକୁ ଏଥିରେ ସାମିଲ କରାଯାଇ ଅଧିକରୁ ଅଧିକ ଯୋଗ୍ୟ ନାଗରିକଙ୍କ ନାମ ପଞ୍ଜୀକରଣରେ ସହଯୋଗ ନିଆଯିବ। ନୟାଗଡ଼ ଜିଲ୍ଲାପାଳ ତଥା ଜିଲ୍ଲା ନିର୍ବାଚନ ଅଧିକାରୀଙ୍କ ପକ୍ଷରୁ ସମସ୍ତ ଯୋଗ୍ୟ ନାଗରିକଙ୍କୁ ଏହି ସୁଯୋଗର ସଦୁପଯୋଗ କରି ଭୋଟର ତାଲିକାରେ ନିଜ ନାମ ପଞ୍ଜୀକରଣ କରିବାକୁ ଆହ୍ୱାନ କରାଯାଇଛି। ଏଥିସହ ERO, AERO, BLO ଓ ସମ୍ପୃକ୍ତ ଅଧିକାରୀମାନଙ୍କୁ ଯୋଗ୍ୟ ନାଗରିକଙ୍କ ନାମ ପଞ୍ଜୀକରଣ ସୁନିଶ୍ଚିତ କରିବାକୁ ନିଷ୍ଠାର ସହ କାର୍ଯ୍ୟ କରିବା ପାଇଁ ନିର୍ଦ୍ଦେଶ ରହିଛି। ଅଭିଯାନର ପ୍ରଗତିକୁ ନିୟମିତ ଭାବେ ତଦାରଖ ଓ ସମୀକ୍ଷା କରାଯିବ। କୌଣସି ଯୋଗ୍ୟ ନାଗରିକ ଭୋଟର ଭାବେ ନାମ ପଞ୍ଜୀକରଣର ସୁଯୋଗରୁ ବଞ୍ଚିତ ନ ହୁଅନ୍ତି, ସେଥିପାଇଁ ଜିଲ୍ଲା ପ୍ରଶାସନ ପକ୍ଷରୁ ଆବଶ୍ୟକ ସମସ୍ତ ପଦକ୍ଷେପ ଗ୍ରହଣ କରାଯିବ।
SIR ପରେ ଅବଶିଷ୍ଟ ଓ ପ୍ରଥମ ଥର ଭୋଟରଙ୍କ ନାମ ପଞ୍ଜୀକରଣ ପାଇଁ ବିଶେଷ ଅଭିଯାନ
