‘ଭୋଟ୍ ବଞ୍ଚାଅ–ଦେଶ ବଞ୍ଚାଅ’ ଅଭିଯାନ:୨ରୁ ୮ ଅକ୍ଟୋବର ପର୍ଯ୍ୟନ୍ତ ଜିଲ୍ଲାସ୍ତରୀୟ ‘ଗଣତନ୍ତ୍ର ବଞ୍ଚାଅ ସପ୍ତାହ’

ଗଞ୍ଜାମ, (ଓଡ଼ିଶା ଲେଖା): ଅକ୍ଟୋବର ୨ରୁ ୮ ତାରିଖ ପର୍ଯ୍ୟନ୍ତ ଦେଶବ୍ୟାପୀ ଜିଲ୍ଲାସ୍ତରୀୟ ‘ଗଣତନ୍ତ୍ର ବଞ୍ଚାଅ ସପ୍ତାହ’ ପାଳନ କରିବାକୁ କଂଗ୍ରେସ ପକ୍ଷରୁ ଆହ୍ୱାନ ଦିଆଯାଇଛି। ଏହାର ଅଂଶ ଭାବେ ‘ଭୋଟ୍ ବଞ୍ଚାଅ–ଦେଶ ବଞ୍ଚାଅ’ ନାମରେ ପଦଯାତ୍ରା ଓ ବିଭିନ୍ନ ଜନଜାଗରଣ କାର୍ଯ୍ୟକ୍ରମ ଆୟୋଜନ କରାଯିବ।ଏଆଇସିସି ସାଧାରଣ ସମ୍ପାଦକ (ସଂଗଠନ) କେ.ସି. ବେଣୁଗୋପାଳଙ୍କ ପକ୍ଷରୁ ଜାରି ନିର୍ଦ୍ଦେଶ ଅନୁଯାୟୀ ପିସିସି ଓ ଡିସିସି ସ୍ତରରେ କାର୍ଯ୍ୟକ୍ରମକୁ ସମନ୍ୱିତ ଭାବେ କାର୍ଯ୍ୟକାରୀ କରାଯିବ। ରାଜ୍ୟ ଓ ଜିଲ୍ଲା ନେତୃତ୍ୱ, ବିଧାୟକ, ଦଳୀୟ କର୍ମକର୍ତ୍ତା, ବିଭିନ୍ନ ସଂଗଠନ ଓ ତୃଣମୂଳସ୍ତରର କର୍ମୀମାନେ ଏଥିରେ ଯୋଗଦେବାକୁ କୁହାଯାଇଛି। ମିଳିତ ବିରୋଧୀ ମୋର୍ଚ୍ଚା INDIA bloc ମଧ୍ୟ ୨ରୁ ୮ ଅକ୍ଟୋବର ମଧ୍ୟରେ ଜିଲ୍ଲାସ୍ତରୀୟ ‘Save Democracy’ ପଦଯାତ୍ରା ଓ ପ୍ରଦର୍ଶନ ଘୋଷଣା କରିଛି। ଗଞ୍ଜାମ ଜିଲ୍ଲା ପଶ୍ଚିମ କଂଗ୍ରେସ ପକ୍ଷରୁ ଜାରି ପ୍ରେସ ବିଜ୍ଞପ୍ତିରେ ଜିଲ୍ଲାର ସମସ୍ତ କଂଗ୍ରେସ କର୍ମୀଙ୍କୁ ଏହି ଅଭିଯାନରେ ସହଯୋଗ କରିବା ସହ ଜିଲ୍ଲା ଓ ବ୍ଲକ ସ୍ତରରେ କାର୍ଯ୍ୟକ୍ରମ ପାଳନ କରିବାକୁ ଅନୁରୋଧ କରାଯାଇଛି। ନିର୍ବାଚନ କମିଶନଙ୍କ କାର୍ଯ୍ୟପ୍ରଣାଳୀ ଓ ଭୋଟର ତାଲିକାର ବିଶେଷ ସଂଶୋଧନ ପ୍ରକ୍ରିୟା (SIR)କୁ ନେଇ ବିରୋଧୀ ଦଳଗୁଡ଼ିକ ପ୍ରଶ୍ନ ଉଠାଇଆସୁଛନ୍ତି। ଏହି ପ୍ରସଙ୍ଗରେ INDIA bloc ପକ୍ଷରୁ ଅକ୍ଟୋବର ୬ରେ ବିରୋଧୀ ସାଂସଦମାନଙ୍କ ନିର୍ବାଚନ କମିଶନ କାର୍ଯ୍ୟାଳୟ ଅଭିମୁଖେ ପଦଯାତ୍ରା ମଧ୍ୟ ଘୋଷଣା କରାଯାଇଛି । କଂଗ୍ରେସ ପକ୍ଷରୁ ଏହି ଅଭିଯାନରେ ଭୋଟର ଅଧିକାର ଓ ନିର୍ବାଚନୀ ପ୍ରକ୍ରିୟା ସମ୍ପର୍କିତ ଜନସଚେତନତାକୁ ଗୁରୁତ୍ୱ ଦିଆଯାଉଛି। ସେହିପରି ସୋସିଆଲ ମିଡିଆ ଟିମ୍ ମାଧ୍ୟମରେ କାର୍ଯ୍ୟକ୍ରମର ପ୍ରଚାର-ପ୍ରସାର କରାଯିବ ବୋଲି ଦଳୀୟ ନିର୍ଦ୍ଦେଶନାମାରେ କୁହାଯାଇଛି। ଭାରତୀୟ ସମ୍ବିଧାନର ଧାରା ୩୨୬ ଅନୁଯାୟୀ, ନିର୍ଦ୍ଦିଷ୍ଟ ଆଇନଗତ ଅଯୋଗ୍ୟତା ନଥିବା ୧୮ ବର୍ଷ କିମ୍ବା ତଦୂର୍ଦ୍ଧ୍ୱ ଭାରତୀୟ ନାଗରିକଙ୍କ ପାଇଁ ଲୋକସଭା ଓ ରାଜ୍ୟ ବିଧାନସଭା ନିର୍ବାଚନରେ ପ୍ରାପ୍ତବୟସ୍କ ମତାଧିକାରର ବ୍ୟବସ୍ଥା ରହିଛି।