ଲଗାଣ ବର୍ଷାରେ କଲବଲ ଖେଡ଼ବାରଣା ଗ୍ରାମବାସୀ : ଗାଁକୁ ପଶିଲା କୁସୁମୀ ଓ ଲୁଣିଝରା ନଦୀର ବନ୍ୟାଜଳ : ଭୟଭୀତ ଗ୍ରାମବାସୀ : ଅଗ୍ନିଶମ ବାହିନୀ ମୁତୟନ

ନୟାଗଡ଼, (ଓଡ଼ିଶା ଲେଖା): ଲଗାଣ ବର୍ଷା ଯୋଗୁଁ ନୟାଗଡ଼ ସଦର ବ୍ଲକ ଅନ୍ତର୍ଗତ ନାଟୁଗାଁ ପଞ୍ଚାୟତର ଖେଡ଼ବାରଣା ଗାଁରେ ବନ୍ୟାଜଳ ପଶିବାରୁ ଲୋକଙ୍କ ମଧ୍ୟରେ ଭୟ ଓ ଆତଙ୍କ ଦେଖାଦେଇଛି। ଗାଁର ଚାରିପାଖ କୁସୁମୀ ଓ ଲୁଣିଝରା ନଦୀ ଘେରି ରହିଥିବା ବେଳେ ଲଗାଣ ବର୍ଷା ପରେ ଉଭୟ ନଦୀରେ ଜଳସ୍ତର ବୃଦ୍ଧି ପାଇଛି। ବନ୍ୟାଜଳ ଚାପ ଯୋଗୁଁ ନଦୀରେ ଘାଇ ସୃଷ୍ଟି ହୋଇ ଗାଁ ଭିତରକୁ ପାଣି ପଶିଥିବା ଜଣାପଡ଼ିଛି। ହଠାତ୍ ଗାଁ ଭିତରକୁ ବନ୍ୟାଜଳ ପ୍ରବେଶ କରିବାରୁ ଗ୍ରାମବାସୀ ଭୟଭୀତ ହୋଇପଡ଼ିଛନ୍ତି। ସ୍ଥାନୀୟ ସରପଞ୍ଚ ସାଗରବାଳା ବରାଡ଼ଙ୍କ ପ୍ରତିନିଧି ଭଗବାନ ଜେନା ଘଟଣାସ୍ଥଳରେ ପହଞ୍ଚି ପରିସ୍ଥିତି ସମ୍ପର୍କରେ ବ୍ଲକ ଓ ଜିଲ୍ଲା ପ୍ରଶାସନକୁ ଅବଗତ କରାଇଥିଲେ। ଖବର ପାଇ ଜିଲ୍ଲା ପ୍ରଶାସନର ଡେପୁଟି କଲେକ୍ଟର ତପତି ରାଜ ଓ ତହସିଲଦାର ରାଜେଶ କେଶରୀ ସ୍ୱାଇଁ ଘଟଣାସ୍ଥଳରେ ପହଞ୍ଚି ବନ୍ୟା ପରିସ୍ଥିତି ଅନୁଧ୍ୟାନ କରିଛନ୍ତି। ପରେ ସ୍ଥିତି ସମ୍ପର୍କରେ ଜିଲ୍ଲାପାଳଙ୍କୁ ରିପୋର୍ଟ କରାଯାଇଥିବା ଜଣାପଡ଼ିଛି। ଅନ୍ୟପକ୍ଷରେ ଗାଁରେ ଅଗ୍ନିଶମ ବାହିନୀ ପହଞ୍ଚି ସ୍ଥିତି ଉପରେ ନଜର ରଖିଛି। ଗାଁରୁ ବନ୍ୟାଜଳ ନିଷ୍କାସନ ପାଇଁ ଆବଶ୍ୟକ ପ୍ରସ୍ତୁତି ଆରମ୍ଭ ହୋଇଥିବା ସୂଚନା ମିଳିଛି। ବର୍ଷା ଜାରି ରହିଲେ ସ୍ଥିତି ଅଧିକ ଗମ୍ଭୀର ହେବାର ଆଶଙ୍କା ଥିବାରୁ ପ୍ରଶାସନ ପକ୍ଷରୁ ସତର୍କତା ଅବଲମ୍ବନ କରାଯାଇଛି।