ଭଞ୍ଜନଗର, (ଓଡ଼ିଶା ଲେଖା): ଘୁମୁସରର ଗୌରବମୟ ଇତିହାସ ଓ ଓଡ଼ିଆ ଭାଷା ପ୍ରତି ଏହାର ଅବଦାନକୁ ସ୍ମରଣ କରି ଘୁମୁସର ଦିବସ ପାଳନ ଅବସରରେ ଗୁଞ୍ଜରିତ ହୋଇଥିଲା— “ଆମେ ଘୁମୁସରିଆ ଭାରି ବଢ଼ିଆ”। ୧୮୭୦ ମସିହା ସେପ୍ଟେମ୍ବର ୧୧ ତାରିଖରେ ଓଡ଼ିଆ ଭାଷାଭାଷୀ ଅଞ୍ଚଳଗୁଡ଼ିକୁ ଏକତ୍ରିତ କରିବା ସହ ଓଡ଼ିଆ ଭାଷାକୁ ରାଜଭାଷାର ମାନ୍ୟତା ଦେବା ଦାବିରେ ଏକ ଐତିହାସିକ ଆନ୍ଦୋଳନର ସ୍ୱର ଉଠିଥିଲା। ସେତେବେଳର ଘଡ଼ିସନ୍ଧି ମୁହୂର୍ତ୍ତରେ ଘୁମୁସର କାନକୁଟୁରର ଜନାର୍ଦ୍ଦନ ଦାସଙ୍କ ଆବାହକତ୍ୱରେ ରସୁଲକୋଣ୍ଡାର ଦୀନବନ୍ଧୁ ପଟ୍ଟନାୟକ, କାଟିଗାଁର ରାଜା ଭେଙ୍କଟେଶ ଦେଓ ଏବଂ ଅନ୍ୟାନ୍ୟ ଜମିଦାର ଓ ବିଶିଷ୍ଟ ବ୍ୟକ୍ତିଙ୍କ ସହଯୋଗରେ ରସୁଲକୋଣ୍ଡା, ବର୍ତ୍ତମାନର ଭଞ୍ଜନଗର ମେନ୍ ରୋଡ଼ସ୍ଥିତ ଠାକୁରାଣୀ ପଡ଼ିଆରେ ଏକ ବିରାଟ ସମାବେଶ ଅନୁଷ୍ଠିତ ହୋଇଥିଲା। ଏହି ସମାବେଶରେ ଓଡ଼ିଆ ଭାଷାର ସ୍ୱାଭିମାନ ଓ ଅଧିକାର ପାଇଁ ଓଡ଼ିଶା ଇତିହାସରେ ପ୍ରଥମଥର ପାଇଁ ଉଦ୍ଦାମ ସ୍ୱର ଉତ୍ତୋଳନ କରାଯାଇଥିଲା। ସେହି ଐତିହାସିକ ସ୍ମୃତିକୁ ଜାଗ୍ରତ ଓ ଜୀବନ୍ତ ରଖିବା ନିମନ୍ତେ ପ୍ରତିବର୍ଷ ସେପ୍ଟେମ୍ବର ୧୧ ତାରିଖକୁ ଗଞ୍ଜାମ ସମେତ ସାରା ଓଡ଼ିଶାରେ ‘ଘୁମୁସର ଦିବସ’ ଭାବେ ପାଳନ କରାଯାଇଆସୁଛି। ଏହି ପରିପ୍ରେକ୍ଷୀରେ ଭଞ୍ଜନଗର ସହରର ଅଗ୍ରଣୀ ତ୍ରିରଙ୍ଗା ମିଡ଼ିଆ ଓ ସାମାଜିକ ଅନୁଷ୍ଠାନ ପକ୍ଷରୁ ଘୁମୁସର ଦିବସ ପାଳନ କରାଯାଇଥିଲା। ଉପସ୍ଥିତ ଅତିଥିମାନେ ଘୁମୁସର ଦିବସର ଇତିହାସ, ଏହାର ମହତ୍ତ୍ୱ ଏବଂ ଦିବସ ପାଳନର ମୂଳ ଲକ୍ଷ୍ୟ ସମ୍ପର୍କରେ ସବିଶେଷ ଆଲୋକପାତ କରିଥିଲେ। ଏହି ଅବସରରେ ଘୁମୁସର ଦିବସକୁ ସରକାରୀ ମାନ୍ୟତା ପ୍ରଦାନ ଦାବିରେ ଏକ ହସ୍ତାକ୍ଷର ଅଭିଯାନ ଚାଲିଥିଲା। ଏଥିସହ ଚକରା ବିଷୋୟୀ ଛକଠାରେ ଜନସାଧାରଣଙ୍କୁ ବିସ୍କୁଟ ପ୍ୟାକେଟ ବଣ୍ଟନ କରାଯାଇଥିଲା। ସେହିପରି ଘୁମୁସର ବିକାଶ ପରିଷଦ, ବରିଷ୍ଠ ନାଗରିକ ମଞ୍ଚ ସମେତ ଅନେକ ସାମାଜିକ ଓ ସାଂସ୍କୃତିକ ଅନୁଷ୍ଠାନ ପକ୍ଷରୁ ମଧ୍ୟ ଉତ୍ସାହ ଓ ଉଦ୍ଦୀପନାର ସହିତ ଘୁମୁସର ଦିବସ ପାଳନ କରାଯାଇଥିଲା। ଦିନଭରି ବିଭିନ୍ନ କାର୍ଯ୍ୟକ୍ରମରେ ଘୁମୁସରର ଗୌରବମୟ ଐତିହ୍ୟକୁ ସ୍ମରଣ କରାଯିବା ସହ “ଆମେ ଘୁମୁସରିଆ ଭାରି ବଢ଼ିଆ” ସ୍ଲୋଗାନରେ ପରିବେଶ ମୁଖରିତ ହୋଇଉଠିଥିଲା।
ରିପୋର୍ଟ: ରବି ନାରାୟଣ ଦାଶ
