‘ଲଭ୍ ଜିହାଦ’ ନାଟକକୁ ନେଇ ତୀବ୍ର ହେଉଛି ବିବାଦ:ଠାକୁର ନୀଳମାଧବଙ୍କୁ ଅସମ୍ମାନ ଅଭିଯୋଗ, ବିବାଦୀୟ ଦୃଶ୍ୟ ହଟାଇବାକୁ ଚେତାବନୀ

ନୟାଗଡ଼, (ଓଡ଼ିଶା ଲେଖା): ଯାତ୍ରା ଜଗତର ଚର୍ଚ୍ଚିତ ନାଟକ ‘ଲଭ୍ ଜିହାଦ’କୁ ନେଇ ବିବାଦ ଥମିବାର ନାଁ ନେଉନାହିଁ। ଧଉଳି ଗଣନାଟ୍ୟ ପକ୍ଷରୁ ପରିବେଷିତ ଏହି ନାଟକରେ ଠାକୁର ନୀଳମାଧବଙ୍କୁ ଅସମ୍ମାନ କରାଯାଇଥିବା ଅଭିଯୋଗକୁ ନେଇ ବିରୋଧର ସ୍ବର ତୀବ୍ର ହୋଇଛି। ନାଟକର କିଛି ଦୃଶ୍ୟ ଧାର୍ମିକ ଭାବନାକୁ ଆଘାତ କରୁଥିବା ଅଭିଯୋଗ ଉଠିଥିବା ବେଳେ ଏହାକୁ ନେଇ କଣ୍ଟିଲୋ ନୀଳମାଧବ ମନ୍ଦିରର ସେବାୟତମାନେ ମଧ୍ୟ ଆପତ୍ତି ଉଠାଇଛନ୍ତି। ଧାର୍ମିକ ଭାବନା ସହ ଖେଳ ଚଳିବ ନାହିଁ ବୋଲି ସେବାୟତମାନେ କହିଛନ୍ତି। ବିବାଦୀୟ ଦୃଶ୍ୟ ତୁରନ୍ତ ହଟାଇବା ସହ କଣ୍ଟିଲୋ ନୀଳମାଧବଙ୍କ ପୀଠକୁ ଆସି କ୍ଷମା ପ୍ରାର୍ଥନା କରନ୍ତୁ ବୋଲି ଦାବି କରିବା ସହ ଏହା ନକରାଗଲେ ନାଟକ ଚାଲିବାକୁ ଦିଆଯିବ ନାହିଁ ବୋଲି ଚେତାବନୀ ଦିଆଯାଇଛି। ଏବଂ ଥାନାର ଦ୍ୱାରସ୍ଥ ହୋଇ ଆଇନ୍ ଅନୁଯାୟୀ ପଦକ୍ଷେପ ନିଆଯିବ ବୋଲି ମଧ୍ଯ ଚେତାବନୀ ମିଳିଛି। ଫଳରେ ଯାତ୍ରା ନାଟକକୁ ନେଇ ବିବାଦ ଆହୁରି ତୀବ୍ର ହେବା ସହ ସ୍ଥାନୀୟ ଅଞ୍ଚଳରେ ଏହାକୁ ନେଇ ଚର୍ଚ୍ଚା ଜୋର ଧରିଛି। ଏପଟେ ଅଭିଯୋଗକୁ ନେଇ ନାଟକ ପକ୍ଷରୁ କୌଣସି ଆଧିକାରିକ ପ୍ରତିକ୍ରିୟା ମିଳିନଥିବା ବେଳେ ବିବାଦୀୟ ଦୃଶ୍ୟ ହଟାଯିବ କି ନାହିଁ, ତାହା ଉପରେ ଏବେ ସମସ୍ତଙ୍କ ନଜର ରହିଛି।