ନୟାଗଡ଼, (ଓଡ଼ିଶା ଲେଖା): ନୟାଗଡ଼ ଟାଉନ୍ ରେଳ ଷ୍ଟେସନରେ ଯାତ୍ରୀ ସୁବିଧା ଓ ରେଳ ସେବାର ବିକାଶ ପାଇଁ ପାଞ୍ଚ ଦଫା ଦାବି ନେଇ ନୟାଗଡ଼ ନାଗରିକ ମଞ୍ଚ ପକ୍ଷରୁ ପୂର୍ବତଟ ରେଳପଥର ମହାପ୍ରବନ୍ଧକ ପରମେଶ୍ୱର ଫୁଙ୍କୱାଲଙ୍କୁ ସାକ୍ଷାତ କରାଯାଇଛି। ଏନେଇ ମଞ୍ଚ ପକ୍ଷରୁ ଏକ ସ୍ମାରକପତ୍ର ପ୍ରଦାନ ସହ ବିଭିନ୍ନ ସମସ୍ୟା ନେଇ ଆଲୋଚନା କରାଯାଇଥିଲା। ନାଗରିକ ମଞ୍ଚର ପ୍ରମୁଖ ଦାବି ମଧ୍ୟରେ ଦଶପଲ୍ଲା-ଭୁବନେଶ୍ୱର ସେବା ଏକ୍ସପ୍ରେସ (୧୮୪୨୪/୧୮୪୨୩)କୁ କଟକ ପର୍ଯ୍ୟନ୍ତ ସମ୍ପ୍ରସାରଣ କରିବା ଅନ୍ୟତମ। ଏହାଦ୍ୱାରା ନୟାଗଡ଼ ଜିଲ୍ଲାବାସୀ କଟକର ଏସ୍ସିବି ମେଡିକାଲ କଲେଜ ଓ ହସ୍ପିଟାଲ ଏବଂ ଓଡ଼ିଶା ହାଇକୋର୍ଟକୁ ଯାତାୟାତରେ ବିଶେଷ ସୁବିଧା ପାଇପାରିବେ ବୋଲି ମଞ୍ଚ ପକ୍ଷରୁ କୁହାଯାଇଛି। ସେହିପରି ଯାତ୍ରୀ ସଂଖ୍ୟା ବୃଦ୍ଧି ଓ ଟ୍ରେନ୍ଗୁଡ଼ିକରେ ଅତ୍ୟଧିକ ଭିଡ଼କୁ ଦୃଷ୍ଟିରେ ରଖି ଚାଲୁଥିବା ଟ୍ରେନ୍ରେ ଅଧିକ ବଗି ସଂଯୋଗ କରିବାକୁ ଦାବି ହୋଇଛି। ସକାଳ ୭ଟା ୩୦ରୁ ଅପରାହ୍ନ ୪ଟା ୩୦ ମଧ୍ୟରେ ନୟାଗଡ଼ ଟାଉନ୍ ଷ୍ଟେସନରେ ଟ୍ରେନ୍ ସେବାରେ ଥିବା ଦୀର୍ଘ ବ୍ୟବଧାନକୁ ଦୂର କରିବା ପାଇଁ ଖୋର୍ଦ୍ଧା ରୋଡ୍ରେ ପ୍ରାୟ ୫ ଘଣ୍ଟା ଧରି ରହୁଥିବା କେନ୍ଦୁଝର ରୋଡ୍-ଖୋର୍ଦ୍ଧା ରୋଡ୍ ଲୋକାଲ ଟ୍ରେନ୍ (୬୮୪୨୫/୬୮୪୨୬)କୁ ନୟାଗଡ଼ ଟାଉନ୍ ପର୍ଯ୍ୟନ୍ତ ସମ୍ପ୍ରସାରଣ କରିବାକୁ ମଧ୍ୟ ଦାବି କରାଯାଇଛି। ଏଥିସହ ଷ୍ଟେସନର ପ୍ଲାଟଫର୍ମ ନମ୍ବର ୨ ଓ ୩ର ନିର୍ମାଣ କାର୍ଯ୍ୟ ସମ୍ପୂର୍ଣ୍ଣ ହୋଇଥିବାରୁ ଏହାକୁ ଶୀଘ୍ର କାର୍ଯ୍ୟକ୍ଷମ କରିବା, ଟ୍ରେନ୍ର ବଗି ଓ ଷ୍ଟେସନ ପ୍ଲାଟଫର୍ମରେ ସ୍ୱଚ୍ଛତା ବ୍ୟବସ୍ଥାକୁ ସୁଦୃଢ଼ କରିବା ଏବଂ ନିୟମିତ ତଦାରଖ କରିବାକୁ ମଞ୍ଚ ପକ୍ଷରୁ ଦାବି ରଖାଯାଇଛି। ଆଲୋଚନା ସମୟରେ ରେଳ ମହାପ୍ରବନ୍ଧକ ଶ୍ରୀ ଫୁଙ୍କୱାଲ ନାଗରିକ ମଞ୍ଚର ଦାବିଗୁଡ଼ିକୁ ଗୁରୁତ୍ୱର ସହ ବିଚାର କରି ଆବଶ୍ୟକ ପଦକ୍ଷେପ ନିଆଯିବ ବୋଲି ପ୍ରତିଶ୍ରୁତି ଦେଇଥିବା ମଞ୍ଚ ପକ୍ଷରୁ କୁହାଯାଇଛି। ଏହି ଆଲୋଚନାରେ ନୟାଗଡ଼ ନାଗରିକ ମଞ୍ଚର ସଭାପତି ପ୍ରମୋଦ ପଟ୍ଟନାୟକ, ଉପସଭାପତି ପ୍ରଦୀପ କୁମାର ସାହୁ, ସମ୍ପାଦକ ଲକ୍ଷ୍ମୀଧର ସାହୁ, ବରିଷ୍ଠ ସଦସ୍ୟ ଦୁର୍ଯ୍ୟୋଧନ ସାହୁ, ଗୋକୁଳ ଚନ୍ଦ୍ର ଷଡ଼ଙ୍ଗୀ ପ୍ରମୁଖ ଉପସ୍ଥିତ ଥିଲେ। ସୂଚନାଯୋଗ୍ୟ, ରେଳ ମହାପ୍ରବନ୍ଧକ ଶ୍ରୀ ଫୁଙ୍କୱାଲ ଆଜି ପୂର୍ବାହ୍ନରେ ସରକାରୀ କାର୍ଯ୍ୟରେ ଭୁବନେଶ୍ୱରରୁ ଦଶପଲ୍ଲା ଅଭିମୁଖେ ଦଶପଲ୍ଲା-ଭୁବନେଶ୍ୱର ମେମୁ ପାସେଞ୍ଜର ଟ୍ରେନ୍ରେ ଯାତ୍ରା କରିଥିଲେ। ନୟାଗଡ଼ବାସୀଙ୍କ ଯୁକ୍ତିଯୁକ୍ତ ଦାବିଗୁଡ଼ିକୁ ରେଳ ବିଭାଗ ଶୀଘ୍ର ବିଚାର କରି ପଦକ୍ଷେପ ନେବ ବୋଲି ନାଗରିକ ମଞ୍ଚ ଆଶା ପ୍ରକାଶ କରିଛି।
ନୟାଗଡ଼ ଟାଉନ୍ ଷ୍ଟେସନ ବିକାଶ ପାଇଁ ଅଣ୍ଟା ଭିଡ଼ିଲେ ପ୍ରମୋଦ : ବିଭିନ୍ନ ଦାବି ନେଇ ରେଳ ମହାପ୍ରବନ୍ଧକଙ୍କୁ ଭେଟିଲା ନାଗରିକ ମଞ୍ଚ
