ନୟାଗଡ଼, (ଓଡ଼ିଶା ଲେଖା): ନୟାଗଡ଼ ସରସ୍ବତୀ ଶିଶୁବିଦ୍ୟା ମନ୍ଦିର ପରିସରରେ ପବିତ୍ର ଶ୍ରୀକୃଷ୍ଣ ଜନ୍ମାଷ୍ଟମୀ ଉତ୍ସବ ମହାସମାରୋହରେ ଅନୁଷ୍ଠିତ ହୋଇଯାଇଛି। ଏହି ଅବସରରେ ସମଗ୍ର ବିଦ୍ୟାଳୟ ପରିସର ଭକ୍ତି ଓ ଆଧ୍ୟାତ୍ମିକ ପରିବେଶରେ ମୁଖରିତ ହୋଇଥିଲା। ବିଦ୍ୟାଳୟର ପ୍ରଧାନାଚାର୍ଯ୍ୟ ସଞ୍ଜୟ କୁମାର ପ୍ରଧାନ ପଟ୍ଟନାୟକ ଅତିଥି ଓ ମୁଖ୍ୟ ବକ୍ତାଙ୍କ ପରିଚୟ ପ୍ରଦାନ କରିଥିଲେ। ଲେଙ୍କୁଡ଼ିପଡ଼ା ମଠାଧୀଶ ଶ୍ରୀଶ୍ରୀ ପୂର୍ଣ୍ଣାନନ୍ଦ ମହାରାଜ ସ୍ୱହସ୍ତେ ମା’ ସରସ୍ବତୀ ଓ ଭଗବାନ ଶ୍ରୀକୃଷ୍ଣଙ୍କ ନିକଟରେ ଦୀପ ପ୍ରଜ୍ୱଳନ କରି ସମସ୍ତଙ୍କ ମଙ୍ଗଳ କାମନା କରିଥିଲେ। ଏହି ଅବସରରେ ମହାରାଜଙ୍କ ଦ୍ୱାରା ନାମ ସଂକୀର୍ତ୍ତନ ଓ ଭଗବାନ ଶ୍ରୀକୃଷ୍ଣଙ୍କ ଜୀବନୀ ବର୍ଣ୍ଣନା କରାଯାଇଥିଲା। ତାଙ୍କ ଭକ୍ତିମୟ ବାଣୀ ଓ କୃଷ୍ଣନାମ ସଂକୀର୍ତ୍ତନରେ ସମଗ୍ର ପରିବେଶ ଭାବମୟ ହୋଇଉଠିଥିଲା। ଭକ୍ତିମୟ ଜୟଧ୍ୱନିରେ ଗଗନପବନ ପ୍ରକମ୍ପିତ ହୋଇଥିଲା।ଜନ୍ମାଷ୍ଟମୀ ଉତ୍ସବର ମୁଖ୍ୟ ଆକର୍ଷଣ ଥିଲା ଶିଶୁମାନଙ୍କ ବେଶ।
ପ୍ରାୟ ୨୦୦ରୁ ଊର୍ଦ୍ଧ୍ୱ ଶିଶୁ ଭାଇଭଉଣୀ ରାଧାକୃଷ୍ଣ, ଗୋପୀ, ଗୋପାଳ, ନନ୍ଦ, କୃଷ୍ଣ-ବଳରାମ ଓ ଯଶୋଦାଙ୍କ ବେଶରେ ସଜି ଉତ୍ସବରେ ଯୋଗଦେଇଥିଲେ। ଅଭିଭାବିକା ମା’ମାନେ ଓ ଗୁରୁମା’ମାନେ ଶିଶୁମାନଙ୍କୁ ବନ୍ଦାପନା କରିଥିଲେ। ଅଭିଭାବକ, ଅଭିଭାବିକା ଓ ଶିଶୁ ଭାଇଭଉଣୀମାନେ ଭାବବିହ୍ୱଳ ହୋଇ ନୃତ୍ୟରେ ସାମିଲ ହୋଇଥିଲେ। ଏହି ଉତ୍ସବରେ ପ୍ରାୟ ୪୦୦ ଛାତ୍ରଛାତ୍ରୀ ଉପସ୍ଥିତ ଥିଲେ। ପ୍ରଧାନାଚାର୍ଯ୍ୟ, ବିଦ୍ୟାଳୟ ସମ୍ପାଦକ ଭିକ୍ଷାକାରୀ ସ୍ୱାଇଁ ଓ ସଭାପତି ଅନ୍ତର୍ଯ୍ୟାମୀ ମହାନ୍ତିଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ଏବଂ ଗୁରୁଜୀ-ଗୁରୁମା’ମାନଙ୍କ ସହଯୋଗରେ କାର୍ଯ୍ୟକ୍ରମଟି ସଫଳତାର ସହ ସମ୍ପନ୍ନ ହୋଇଥିଲା। ଏହି ଭବ୍ୟ ଆୟୋଜନ ଫଳରେ ବିଦ୍ୟାଳୟ ପରିସରରେ ଏକ ଭକ୍ତିମୟ ଓ ଆଧ୍ୟାତ୍ମିକ ବାତାବରଣ ସୃଷ୍ଟି ହୋଇଥିଲା।
