ବିଜେପି ନେତ୍ରୀଙ୍କ ଜାଲି ଦସ୍ତଖତ ପ୍ରସଙ୍ଗ:ପ୍ରତିକ୍ରିୟା ରଖିଲେ କଂଗ୍ରେସର ଜିଲ୍ଲା ସଭାପତି

ନୟାଗଡ଼, (ଓଡ଼ିଶା ଲେଖା): ନୟାଗଡ଼ର ବିଜେପି ନେତ୍ରୀ ତଥା ପୂର୍ବତନ ସାଂସଦଙ୍କ ଲେଟର ପ୍ୟାଡ଼, ସିଲ ଏବଂ ଦସ୍ତଖତ ଜାଲି କରାଯାଇ ନୟାଗଡ଼ ଅତିରିକ୍ତ ଆରକ୍ଷୀ ଅଧିକ୍ଷକ ଜ୍ୟୋତିରଞ୍ଜନ ସାମନ୍ତରାୟଙ୍କ ବଦଳି ପ୍ରସଙ୍ଗରେ ମୁଖ୍ୟମନ୍ତ୍ରୀଙ୍କୁ ସୁପାରିଶ ଶୀର୍ଷକ ଚିଠିର ସତ୍ୟତାକୁ ନେଇ ନିଜେ ପୂର୍ବତନ ସାଂସଦ ନୟାଗଡ଼ ଥାନାରେ ଲିଖିତ ଅଭିଯୋଗ କଲାପରେ ସମଗ୍ର ଘଟଣାକ୍ରମ ଉପରେ ପୋଲିସ ଉଚ୍ଚସ୍ତରୀୟ ତଦନ୍ତ ଆବଶ୍ୟକତା ରହିଥିବା ଜିଲ୍ଲା କଂଗ୍ରେସ ସଭାପତି ରଣଜିତ ଦାଶ କହିଛନ୍ତି । ବିଜେପି ନେତ୍ରୀଙ୍କ ଦସ୍ତଖତ ଜାଲି ହୋଇଥିଲେ ତାହାର ସତ୍ୟତା ଅନୁଧ୍ୟାନ ପାଇଁ ମୁଖ୍ୟମନ୍ତ୍ରୀଙ୍କ ଉଦ୍ଧେଶ୍ୟରେ ହୋଇଥିବା ଚିଠି ଏବଂ ଥାନାରେ ଦିଆଯାଇଥିବା ଲିଖିତ ଅଭିଯୋଗରେ ବିଜେପି ନେତ୍ରୀଙ୍କ ଦସ୍ତଖତ ଏବଂ ତାଙ୍କର ଆଇନ ଅନୁସାରେ ଦଶଗୋଟି ସ୍ପେସିମେନ ସିଗ୍ନେଚର ସହିତ ମାନ୍ୟବର ଏସଡିଜେଏମଙ୍କ ଅନୁମୋଦନ କ୍ରମେ ରାଜ୍ୟ ପୋଲିସ ହାଣ୍ଡରାଇଟିଙ୍ଗ ଏକ୍ସପର୍ଟ ସଂସ୍ଥା ପରୀକ୍ଷାଗାର କୁ ଦସ୍ତଖତ ସତ୍ୟତା ଯାଞ୍ଚ ପାଇଁ ତୁରନ୍ତ ପ୍ରେରଣ କରିବା ପାଇଁ କଂଗ୍ରେସ ନେତା ଶ୍ରୀଯୁକ୍ତ ଦାଶ ନୟାଗଡ଼ ଜିଲ୍ଲା ଆରକ୍ଷୀ ଅଧିକ୍ଷକଙ୍କୁ ଟୁଇଟ କରିଛନ୍ତି । ଏଭଳି ସମ୍ବେଦନଶୀଳ ପ୍ରସଙ୍ଗରେ ପୋଲିସ ଉପଯୁକ୍ତ ତଦନ୍ତ କରି ସମ୍ପୃକ୍ତ ବିଭୀଷଣ ମାନଙ୍କୁ ଚିହ୍ନଟ କରାଯାଇ ଦୃଢ଼ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉ । କୋର୍ଟ ଅନୁମତି ନେଇ ରାଜ୍ୟ ପୋଲିସ ହାଣ୍ଡରାଇଟିଙ୍ଗ ଏକ୍ସପର୍ଟ ସଂସ୍ଥା କୁ ଇତାଲାକାରୀଙ୍କ ସ୍ପେସିମେନ ଦସ୍ତଖତ ତୁରନ୍ତ ଯାଞ୍ଚ ପାଇଁ ପଠାଇବା ପାଇଁ କଂଗ୍ରେସ ନେତା ବରିଷ୍ଠ ଆଇନଜୀବୀ ଜିଲ୍ଲା ଆରକ୍ଷୀ ଅଧିକ୍ଷକଙ୍କୁ ଟୁଇଟ କରିଛନ୍ତି ।