ନୟାଗଡ଼, (ଓଡ଼ିଶା ଲେଖା): ନୟାଗଡ଼ ଜିଲ୍ଲା ମହୋତ୍ସବ ତଥା ପଲ୍ଲିଶ୍ରୀ, କୃଷି ଓ ପୁସ୍ତକ ମେଳା-୨୦୨୫ ଡିସେମ୍ବର ୨୪ ତାରିଖରୁ ଆରମ୍ଭ ହୋଇ ୨୮ ତାରିଖ ପର୍ଯ୍ୟନ୍ତ ଚାଲିବ । ଜିଲ୍ଲା ମହୋତ୍ସବ ଉଦଘାଟନ କାର୍ଯ୍ୟକ୍ରମରେ ରାଜସ୍ୱ ମନ୍ତ୍ରୀ ସୁରେଶ ପୂଜାରୀ ଯୋଗ ଦେବେ ବୋଲି ଜିଲ୍ଲାପାଳ ଅକ୍ଷୟ ସୁନୀଲ ଅଗ୍ରୱାଲ ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି । ସକାଳ ୧୦ ଘଟିକାରୁ ରାତି ୧୦ ଘଟିକା ପର୍ଯ୍ୟନ୍ତ ବିଭିନ୍ନ ଷ୍ଟଲ ଖୋଲା ରହିବ ବୋଲି ଜଣାପଡ଼ିଛି । ଚଳିତ ବର୍ଷ ୨୯୦ ଷ୍ଟଲ ନିର୍ମାଣ କରାଯାଇଛି । ସେଥିରୁ ଓରମାସ୍ ଅଧିନରେ ବିଭିନ୍ନ ସ୍ୱଂୟ ସହାୟକ ଗୋଷ୍ଠୀ ପାଇଁ ୧୩୫ ଷ୍ଟଲ ବ୍ୟବସ୍ଥା କରାଯାଇଛି । କୃଷି ମେଳା ପାଇଁ ୫୦ ଷ୍ଟଲ, ଖାଦ୍ୟ ପାଇଁ ୪୦ ଷ୍ଟଲ, ବିଜ୍ଞାପନ ପାଇଁ ୧୦ଟି ଷ୍ଟଲ, ବିଭିନ୍ନ ବିଭାଗ ପାଇଁ ୩୦ ଷ୍ଟଲ, ଜରୁରୀ କାଳୀନ ସହାୟତା ପାଇଁ ୫ଟି ଷ୍ଟଲ ନିର୍ମାଣ କରାଯାଇଛି । ଏବଂ ପୁସ୍ତକ ମେଳା ପାଇଁ ୨୦ ଷ୍ଟଲ ନିର୍ମାଣ କରାଯାଇଛି। ଜଗନ୍ନାଥମନ୍ଦିରଠାରୁ ପିଟିଏସ୍ ପର୍ଯ୍ୟନ୍ତ ରାସ୍ତା ଓ ଆଲୋକିକରଣ କାର୍ଯ୍ୟକୁ ଗୁରୁତ୍ୱ ଦିଆଯାଇଛି ।
ଆଇନଶୃଙ୍ଖଳା ପାଇଁ ବ୍ୟାପକ ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି । ମହୋତ୍ସବ ପଡ଼ିଆକୁ ସମ୍ପୂର୍ଣ୍ଣ ସିସିଟିଭି ଅଧିନରେ ରଖାଯାଉଛି । ପାର୍କିଂ ପାଇଁ ପିଟିଏସ୍ ପଡ଼ିଆରେ ବ୍ୟବସ୍ଥା କରାଯାଇଛି । କେବଳ ଅତିଥିଙ୍କ ଯାନବାହାନ ମହୋତ୍ସବ ପଡ଼ିଆ ନିକଟକୁ ଛଡ଼ା ଯିବ ବୋଲି ସୂଚନା ମିଳିଛି । ଏହା ସହିତ ମହୋତ୍ସବକୁ ଆକର୍ଷଣୀୟ କରିବାକୁ ଦୋଳି, ମୀନା ବଜାର ବ୍ୟବସ୍ଥା ହୋଇଥିବା ଜିଲ୍ଲାପାଳ ସୂଚନା ଦେଇଛନ୍ତି । ସାଂସ୍କୃତିକ କାର୍ଯ୍ୟକ୍ରମକୁ ରଙ୍ଗାରଙ୍ଗ କରିବାକୁ ସ୍ଥାନୀୟ କଳାକାରଙ୍କ ସହ ରାଜ୍ୟ ତଥା ରାଜ୍ୟ ବାହାରୁ ବିଭିନ୍ନ ଦଳ ଆସୁଥିବା ସୂଚନା ମିଳିଛି । ଚଳିତ ବର୍ଷ ମହୋତ୍ସବ ପାଇଁ ୭୦ ଲକ୍ଷ ବଜେଟ୍ ବ୍ୟବସ୍ଥା ହୋଇଥିବା ଜିଲ୍ଲାପାଳ ସୂଚନା ଦେଇଛନ୍ତି । ଆଜିର ସାମ୍ବାଦିକ ସମ୍ମିଳନୀରେ ଅତିରିକ୍ତ ଜିଲ୍ଲାପାଳ ବିଜୟାନନ୍ଦ ନାୟକ, ରୋଜିନା ଦାଶ, ସୂଚନା ଓ ଲୋକ ସମ୍ପର୍କ ଅଧିକାରୀ ଜ୍ୟୋତିମୟୀ ଆଚାର୍ଯ୍ୟ ଉପସ୍ଥିତ ରହିଥିଲେ ।
