ନୟାଗଡ, (ଓଡ଼ିଶା ଲେଖା):ଭାରତ ସରକାରଙ୍କ ଅର୍ଥ ମନ୍ତ୍ରଣାଳୟର ଆର୍ଥିକ ସଚେତନତା କାର୍ଯ୍ୟକ୍ରମ ରିଜର୍ଭବ୍ୟାଙ୍କ ଏବଂ ଲିଡ଼ ବ୍ୟାଙ୍କର ସମନ୍ବିତ ଉଦ୍ୟମରେ ଏକ ସଚେତନତା ଶିବିର ” ଆପଣଙ୍କ ପୁଞ୍ଜି, ଆପଣଙ୍କ ଅଧିକାର” କାର୍ଯ୍ୟକ୍ରମ ଆଜି ଜିଲ୍ଲାପରିଷଦର ସୃଜନ ସମ୍ମିଳନୀ କକ୍ଷରେ ଅନୁଷ୍ଠିତ ହୋଇଯାଇଛି । ଜିଲ୍ଲା ପରିଷଦର ମୁଖ୍ୟ ଉନ୍ନୟନ ଅଧିକାରୀ ଲଗ୍ନଜିତ ରାଉତଙ୍କ ଅଧ୍ଯକ୍ଷତାରେ ଆୟୋଜିତ ସଚେତନତା ଶିବିରରେ ମୁଖ୍ୟ ଅତିଥି ଭାବେ (ଆରବିଆଇ) ର ଡ଼ିଜିଏମ୍ ମଧୁକର ଆନନ୍ଦ ଯୋଗ ଦେଇଥିବା ବେଳେ ସମ୍ମାନିତ ଅତିଥି ଭାବେ ଭଗତ ବେହେରା, ଆର.ଏମ. ଭାରତୀୟ ଷ୍ଟେଟ ବ୍ୟାଙ୍କ ଯୋଗ ଦେଇଥିଲେ । ଲୋହିତ ନନ୍ଦ ଏଲ.ଡି.ଏମ., ନୟାଗଡ କାର୍ଯ୍ୟକ୍ରମ ପରିଚାଳନା କରିଥିଲେ । ହିତାକାରୀ ମାନଙ୍କର ଅଜାଣତରେ ହେଉ କିମ୍ବା ବିଭିନ୍ନ କାରଣ ବଶତଃ ଆକାଉଣ୍ଟରେ ଜମା ରାଶି ପଡ଼ିରହିଥିଲେ, କୌଣସି କାରବାର ହେଉ ନଥିଲେ ୧୦ ବର୍ଷ ପରେ ଏହା ରିଜର୍ଭ ବ୍ୟାଙ୍କକୁ ଫେରି ଯାଇଥାଏ ।
ଏହି ଟଙ୍କା ହିତାକାରୀ ମାନେ ଫେରି ପାଇବା ପାଇଁ ରିଜର୍ଭ ବ୍ୟାଙ୍କର ଏହା ଏକ ପ୍ରଚେଷ୍ଟା । ସେଥିପାଇଁ ହିତାକାରୀ ମାନେ ବ୍ୟାଙ୍କରେ ଖୋଲିଥିବା ଜମା ଖାତାର ଉପଯୁକ୍ତ ପରିଚୟ ପତ୍ର ଓ କେ.ୱାଇ.ସି ଫର୍ମ ପୂରଣ କରି ଆବେଦନ କରିପାରିବେ । ଆଜି ୪ ଜଣ ହିତାକାରୀ ତାଙ୍କ ଜମା ପୁଞ୍ଜିକୁ ଡ୍ରାଫ୍ଟ ଚେକ ଆକାରରେ ଫେରି ପାଇଛନ୍ତି । ସେମାନେ ହେଲେ – ୧. ରଘୁନାଥ ବେହେରା – ୪୭,୫୭୦ ଟଙ୍କା, ୨. ଜାଗିରି ଖଇରାପତି – ସୋସାଇଟି WCS Ltd. ୯୪,୯୧୩ ଟଙ୍କା, ୩. ମଧୁବନ ସୋସାଇଟି WCB Ltd. – ୩,୩୦,୭୭୫ ଟଙ୍କା, ୪. ଭାସ୍କର ଚନ୍ଦ୍ର ଦାଶ- ୭, ୯୯୩ ଟଙ୍କା । ଏହି କାର୍ଯ୍ୟକ୍ରମରେ ସମସ୍ତ ବିଭାଗୀୟ ଅଧିକାରୀ / ବ୍ୟାଙ୍କିଙ୍ଗ ଷ୍ଟାଫ / ବ୍ୟାଙ୍କ ହିତାଧିକାରୀ ପ୍ରମୁଖ ଉପସ୍ଥିତ ଥିଲେ । ଶେଷରେ ସଭା ସାଙ୍ଗ କରାଯାଇଥିଲା ।
