ନୟାଗଡ଼, (ଓଡ଼ିଶା ଲେଖା): ନୟାଗଡ଼ ଜିଲ୍ଲା ଉପନିବନ୍ଧକ କାର୍ଯ୍ୟାଳୟର ନୂତନ ଗୃହ ଗୁରୁବାର ଅପରାହ୍ନ ୩ଟା ସମୟରେ ଲୋକାର୍ପିତ ହୋଇଛି। ପୁରୀ ସାଂସଦ ଡ଼ ସମ୍ବିତ ପାତ୍ରଙ୍କ କରକମଳରେ ଏହି ନୂତନ କାର୍ଯ୍ୟାଳୟ ଗୃହର ଶୁଭ ଉଦ୍ଘାଟନ କରାଯାଇଥିଲା। ଲୋକାର୍ପଣ ଉତ୍ସବରେ ନୟାଗଡ଼ ବିଧାୟକ ଡ଼ ଅରୁଣ କୁମାର ସାହୁ, ଜିଲ୍ଲା ପରିଷଦ ଅଧ୍ୟକ୍ଷ ଇଂ ଦେବାଶିଷ ପଟ୍ଟନାୟକ, ଜିଲ୍ଲାପାଳ ମଧୁମିତା ରଥ, ଅତିରିକ୍ତ ଜିଲ୍ଲାପାଳ ତଥା ଜିଲ୍ଲା ନିବନ୍ଧକ ବିଜୟାନନ୍ଦ ନାୟକ ଏବଂ ଜିଲ୍ଲା ଉପନିବନ୍ଧକ ଡ଼ ସ୍ୱାତିଲେଖା ମାଝୀ ପ୍ରମୁଖ ଉପସ୍ଥିତ ଥିଲେ। ସୂଚନାନୁସାରେ, ନୂତନ କାର୍ଯ୍ୟାଳୟ ଗୃହଟି ପ୍ରାୟ ୧ କୋଟି ୪୦ ଲକ୍ଷ ୬୬ ହଜାର ଟଙ୍କା ବ୍ୟୟ ଅଟକଳରେ ନିର୍ମିତ ହୋଇଛି।
ଏହି ନୂତନ ଭିତ୍ତିଭୂମି ଦ୍ୱାରା ଜିଲ୍ଲାର ସମୁଦାୟ ୨୬୩ଟି ରାଜସ୍ୱ ଗ୍ରାମର ଜନସାଧାରଣ ଉପକୃତ ହେବେ। ନୂତନ କାର୍ଯ୍ୟାଳୟ ଗୃହ ନିବନ୍ଧନ ସମ୍ବନ୍ଧୀୟ ସରକାରୀ ସେବାକୁ ଅଧିକ ସୁବ୍ୟବସ୍ଥିତ ଓ ସୁଗମ କରିବାରେ ସହାୟକ ହେବ ବୋଲି ଆଶା ପ୍ରକାଶ ପାଇଛି। ଏହି ଅବସରରେ ମୋହରୀ ସଂଘର ସଭାପତି ଶ୍ରୀ କ୍ଷୀରୋଦ କୁମାର ମହାପାତ୍ରଙ୍କ ସମେତ ସମସ୍ତ ମୋହରୀ ଓ କାର୍ଯ୍ୟାଳୟର କର୍ମଚାରୀବୃନ୍ଦ ଉପସ୍ଥିତ ରହି ଉତ୍ସବରେ ଯୋଗଦେଇଥିଲେ।
