ନୟାଗଡ଼, (ଓଡ଼ିଶା ଲେଖା): ଓଡ଼ିଶା ମାଧ୍ୟମିକ ଶିକ୍ଷା ବୋର୍ଡ କଟକର ପରୀକ୍ଷା ନିୟନ୍ତ୍ରକ ଧରଣୀଧର ପାତ୍ର ଏବଂ ସ୍ଥାପନା ଅଧିକାରୀ ବୁଲବୁଲ ବେହେରା ଆଜି ନୟାଗଡ଼ ଜିଲ୍ଲା ପରିଦର୍ଶନ ଆସିଥିଲେ। ଏହି ଅବସରରେ ନୟାଗଡ଼ ଜିଲ୍ଲାରେ ବାର୍ଷିକ ହାଇସ୍କୁଲ୍ ସାର୍ଟିଫିକେଟ୍ (HSC) ପରୀକ୍ଷା-୨୦୨୬ର ସୁଚାରୁ ଓ ସଫଳ ପରିଚାଳନା ପାଇଁ ଜିଲ୍ଲା ପ୍ରଶାସନ ଏବଂ ପୁଲିସ ପ୍ରଶାସନର ଭୂମିକାକୁ ପ୍ରଶଂସା କରିଥିଲେ ବୋର୍ଡ଼ କର୍ତ୍ତୃପକ୍ଷ।
ବୋର୍ଡ ପକ୍ଷରୁ ନୟାଗଡ଼ର ଜିଲ୍ଲାପାଳ ତଥା ଜିଲ୍ଲା ମାଜିଷ୍ଟ୍ରେଟ୍ ମଧୁମିତା ରଥ ଏବଂ ଆରକ୍ଷୀ ଅଧୀକ୍ଷକ ଶୁଭେନ୍ଦୁ କୁମାର ପାତ୍ରଙ୍କୁ ସ୍ମାରକୀ ଓ ପ୍ରଶଂସାପତ୍ର ପ୍ରଦାନ କରି ସମ୍ମାନିତ କରାଯାଇଥିଲା। HSC ପରୀକ୍ଷାର ସୁରକ୍ଷିତ, ଶୃଙ୍ଖଳିତ ଓ ନିରପେକ୍ଷ ପରିଚାଳନାରେ ଜିଲ୍ଲା ପ୍ରଶାସନ ଓ ପୁଲିସ ପ୍ରଶାସନର ସମନ୍ୱୟ ଏବଂ ସହଯୋଗକୁ ବୋର୍ଡ ପକ୍ଷରୁ ବିଶେଷ ଭାବେ ପ୍ରଶଂସା କରାଯାଇଛି।
